ՀՀ դեսպան Վահագն Աֆյանը ելույթով հանդես է եկել պաշտպանության և ռազմավարական երկխոսության «Կալամ և Կավաչ» 3-րդ համաժողովին

14 մայիսի, 2026

Մայիսի 14-ին ՀՀ դեսպան Վահագն Աֆյանը Հնդկաստանի ԶՈւ համալիրային Մանեկշաուի անվան կենտրոնում (Manekshaw Centre) ելույթով հանդես է եկել պաշտպանության և ռազմավարական երկխոսության «Կալամ և Կավաչ» (թարգմ.՝ գրիչ և վահան) 3-րդ համաժողովի ընթացքում:

Դեսպան Վ. Աֆյանն իր խոսքում նշել է, որ վերջին տարիներին Հայաստանի և Հնդկաստանի հարաբերություններն ավանդական բարեկամական կապերից վերափոխվել են դինամիկ և բազմաշերտ գործակցության, որի հիմնական հենասյուներից է ռազմատեխնիկական համագործակցությունը։ ՀՀ դեսպանն, անդրադառնալով ոլորտային փոխադարձ այցերին, երկու երկրների բարձրագույն պաշտպանական ղեկավարության միջև ձևավորված ինստիտուցիոնալ երկխոսությանն ու կանոնավոր խորհրդակցություններին, ընդգծել է, որ կառուցվածքային և երկարաժամկետ համագործակցության հեռանկարային առումով կարող է դիտարկվել Հնդկաստանի մասշտաբային և արդյունաբերական կարողության ու Հայաստանի նորարարական և բարձր տեխնոլոգիական ներուժի փոխգործակցության հնարավորությունը: Դեսպանը նաև առանձնանշել է, որ թեև երկու երկրների հարաբերությունները պաշտոնապես դեռևս չեն սահմանվել «ռազմավարական գործընկերություն» անվանակոչմամբ, այդուհանդերձ երկկողմ համագործակցության բովանդակությունն առավելապես արտացոլում է հենց այդ բնույթը։

Քննարկմանը ողջույնի տեսաուղերձով միացել է Հնդկաստանի պաշտպանության նախարար Ռաջնաթ Սինգհը, ինչպես նաև հանդես եկել պետնախարար Սանջայ Սեթը, ով իր խոսքում ևս բարձր է գնահատել Հայաստանի հետ Հնդկաստանի ծավալվող համագործակցությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր